|
डेमोक्रेटिक पुलिसिङ एण्ड ह्युमन राइट्स तालिम समापन |
|
काठमाडौँ, भदौ २५ गते
राष्ट्रिय प्रहरी प्रशिक्षण प्रतिष्ठान महाराजगंजमा संचालित डेमोक्रेटिक पुलिसिङ एण्ड ह्युमन राइट्स विषयक तालिम प्रहरी महानिरीक्षक रमेशचन्द ठकुरीको प्रमुख आतिथ्यमा आज सोही प्रतिष्ठानमा आयोजित एक समारोहबीच समापन भएको छ ।
उक्त अवसरमा प्रमुख अतिथि प्रहरी महानिरीक्षक रमेशचन्द ठकुरी र नेपालका लागि अमेरिकी महामहिम राजदूत स्कोट एच. डेलिसीले प्रशिक्षार्थीहरुलाई प्रमाणपत्र वितरण गर्नुभयो ।
समारोहमा प्रहरी महानिरीक्षक ठकुरीले नेपाल प्रहरी मानव अधिकारको संरक्षणमा सदैव सचेत रहेको उल्लेख गर्नुहुँदै प्रहरी कर्मचारीहरुले कार्यक्षेत्रमा मानव अधिकारको संरक्षणमा विशेष ध्यान दिन र कार्यक्षेत्रमा आइपर्ने समस्या समाधानका लागि तालिम उपलब्धीमुलक हुने विश्वास व्यक्त गर्नुभयो ।
उक्त अवसरमा प्रहरी महानिरीक्षक ठकुरीलाई नेपालका लागि अमेरिकी राजदूत स्कोट एच. डेलिसीले तालिमका लागि सहयोगी सामानहरु जेनेरेटर ५ थान, ल्यापटप ५ थान र तिनका पार्टपूर्जाहरु हस्तान्तरण गर्नुभयो भने प्रहरी महानिरीक्षक ठकुरीले राजदूत डेलिसीलाई नेपाल प्रहरीको तर्फबाट मायाको चिनो प्रदान गर्नुभयो ।
समारोहमा महामहिम राजदूत डेलिसीले तालिममा प्रशिक्षार्थीहरुलाई मानवअधिकारको संरक्षणका लागि चाल्नुपर्ने कदमकाबारेमा जानकारी गराइएको उल्लेख गर्नुहुँदै अमेरिकी राजदूतावासकोतर्फबाट आगामी दिनमा समेत नेपाल प्रहरीलाई सहयोग प्रदान गरिने बताउनुभयो ।
सो प्रतिष्ठानका कार्यकारी निर्देशक प्रहरी अतिरिक्त महानिरीक्षक कल्याणकुमार तिम्सिनाले समारोहमा धन्यबाद ज्ञापन गर्नुभएको थियो भने प्रहरी नायव महानिरीक्षक सुरेन्द्रबहादुर शाहले स्वागत मन्तव्य तथा तालिमका बारेमा प्रकाश पार्नुभएको थियो । साथै प्रहरी निरीक्षक विश्व अधिकारीले प्रशिक्षार्थीहरुको तर्फबाट मन्तव्य व्यक्त गर्नुभएको थियो ।
भदौ १४ गतेबाट संचालित उक्त तालिममा प्रहरी नायव उपरीक्षक १० जना र प्रहरी निरीक्षक ९ जना गरी जम्मा १९ जना प्रशिक्षार्थीहरुको सहभागिता रहेको थियो । |
|
हातहतियारसहित एकजना प्रहरीद्वारा पक्राउ |
|
भक्तपुर, भदौ २५ गते
कटुजे–१ स्थित अरनिको राजमार्गको हनुमन्तेपुल नजिक सल्लाघारीमा प्रहरीले चेकजाँच गर्नेक्रममा काठमाडौँ छाउनी बस्ने रामेछाप जिल्ला सैवु–७ घर भएका २५ वर्षीय सुमन भुजेल हतियारसहित पक्राउ परेका छन् । आज बिहान ९ बजे उक्त चेकजाँचकोक्रममा बा.३७ प ४२३४ नम्बरको कालो पल्सर मोटरसाइकल रोक्न खोज्दा चालकले मोटरसाइकल छोडेर भागेपछि पछाडि सवार निज भुजेलको साथबाट पेस्तोलको गोली ६ राउन्ड, म्याग्जिन १ थान र मोवाईल २ थान बरामद भएको थियो । साथै तत्काल निजको बयानअनुसार सोही ठाउँस्थित धानखेतमा खोजतलास गर्दा म्याग्जिन सहित ४ राउण्ड लोड भएको मेड इन इटाली लेखेको पेस्तोल १ थान बरामद भएको थियो ।
यस सम्बन्धमा प्रहरीबाट आवश्यक अनुसन्धान भइरहेको छ । |
|
|
प्रहरी चौकी तोडफोड गरी थुनुवा लैजाने १३ जना प्रहरीद्वारा पक्राउ |
|
रामेछाप, भदौ २५ गते
सोलेघाट प्रहरी चौकी घेरा हालेर चौकीको ढोका फुटाई थुनामा रहेका ३ जनालाई भगाउने १३ जनालाई प्रहरीले पक्राउ गरेको छ । सो चौकीनजिक रहेको राजु लागाको होटलमा झै–झगडा हुँदा प्रहरीले ३ जनालाई पक्राउ गरिएकोमा भदौ २४ गते राति ८ बजे करीव ६० जनाको संख्यामा आएका स्थानियबासीले घेरा हालेर लिई गएकोमा प्रहरीले हवाई फायर गरी उनीहरुलाई पक्राउ गरेको थियो ।
यस सम्बन्धमा प्रहरीबाट आवश्यक अनुसन्धान भइरहेको छ । |
|
कुटपिट गर्ने दुईजना प्रहरीद्वारा पक्राउ |
|
काठमाडौँ, भदौ २५ गते
काठमाडौँ महानगरपालिका–१६ माछापोखरी बस्ने धादिङ जिल्ला जिवनपुर गाबिस–३ घर भएका २७ वर्षीय बिनोद कार्कीलाई कुटपिट गर्ने २ जनालाई प्रहरीले पक्राउ गरेको छ । उनलाई भदौ २४ गते राति सवा १० बजे मोतिहारी भारत घर भएका १८ वर्षीय मनोहर कुमार र ३० वर्षीय ललन सिंहले रडले कुटपिट गरी घाइते बनाएका थिए । घाइतेलाई उपचारको लागि जनमैत्री अस्पतालमा लगिएको छ ।
यस सम्बन्धमा प्रहरीबाट आवश्यक अनुसन्धान भइरहेको छ । |
|
|
|
|
<< Start < Prev 1 2 3 4 Next > End >>
|
|
Page 1 of 4 |
