सप्तरी, वोदेबसाईन नगरपालिका-५ बजारबाट स्रोत नखुलेको नेपाली रुपैयाँ ५२ लाख ८९ हजार ५ सय रूपैयाँ सहित २ जनालाई आइतबार दिउँसो प्रहरीले पक्राउ गरेको छ । पक्राउ पर्नेहरूमा वोदेबसाईन नगरपालिका-९ देउरी बस्ने ३२ वर्षीय राम बिलास साह तेली र सोही नगरपालिका-७ बस्ने ५० वर्षीय मायानन्दन झा रहेका छन् । वोदेबसाईन नगरपालिका-५ बजारस्थित घरमा कोठा भाडा लिई बस्ने मानिसहरुले स्रोत नखुलेको नेपाली रुपैयाँको कारोबार गरिरहेको भन्ने सूचनाको आधारमा केन्द्रीय अनुसन्धान व्यूरो काठमाडौं र ईलाका प्रहरी कार्यालय कडरबोना सप्तरीबाट खटिएको संयुक्त टोलीले तलासी गर्दा उनीहरूलाई उक्त रुपैयाँ सहित फेला पारी पक्राउ गरेको हो । 

काठमाडौं, काठमाडौं महानगरपालिका-३२ कोटेश्‍वर बालकुमारीस्थित सडकबाट स्रोत नखुलेको नगद ६ लाख ५५ हजार रूपैयाँ र विभिन्न कम्पनीको मोबाइल ७७ थान सहित ललितपुर धापाखेल बस्ने २७ वर्षीय सृजन श्रेष्ठलाई आइतबार दिउँसो प्रहरीले पक्राउ गरेको छ । प्रहरी प्रभाग कोटेश्वरबाट खटिएको प्रहरीले बा.८० प ६२७६ नम्बरको मोटरसाइकल जाँच गर्ने क्रममा मोटरसाइकलमा सवार श्रेष्ठलाई उक्त नगद र मोबाइलहरू सहित फेला पारी पक्राउ गरेको हो । 

यस सम्बन्धमा प्रहरीले थप अनुसन्धान गरिरहेको छ ।