काभ्रे, धुलिखेल नगरपालिका-९ काभ्रेभञ्ज्याङबाट बिल बिजक नभएका करिब ४७ लाख रूपैयाँ बराबरको ११ किलो ६ सय ८२ ग्राम तौलको चाँदीको जस्तो देखिने विभिन्न गरगहना तथा तयारी सामानहरू सहित २ जनालाई शुक्रबार बिहान प्रहरीले पक्राउ गरेको छ । 

पक्राउ पर्नेहरूमा मोरङ लेटाङ नगरपालिका-६ बस्ने ३६ वर्षीय पदम बहादुर विक र उर्लाबारी नगरपालिका-६ बस्ने ४४ वर्षीय खगेन्द्र गजमेर रहेका छन् । अस्थायी प्रहरी पोष्ट काभ्रेभन्ज्याङबाट खटिएको प्रहरीले को.१ च ८६६२ नम्बरको सुमो जाँच गर्दा उक्त गरगहना तथा सामानहरू फेला पारी चालक पदम र सुमोमा सवार खगेन्द्रलाई पक्राउ गरेको हो । 

उनीहरूलाई आवश्यक अनुसन्धान तथा कारबाहीको लागि भन्सार कार्यालय गौचरण पठाइएको छ ।