मकवानपुर, हेटौंडा उपमहानगरपालिका-३ लेवट बस्ने १९ वर्षीय दिपेश सुनारलाई अवैध लागूऔषध खैरो हेरोइन जस्तो देखिने पदार्थ ६ सय २० ग्राम सहित बिहीबार बिहान प्रहरीले पक्राउ गरेको छ । जिल्ला प्रहरी कार्यालय मकवानपुरबाट खटिएको प्रहरीले उनलाई उक्त पदार्थ सहित पक्राउ गरेको हो । थप अनुसन्धानको क्रममा उक्त लागूऔषध हेटौंडा उपमहानगरपालिका-१३ बनस्पति बस्ने २२ वर्षीय सुशान्त थोकरसँग खरिद गरेको खुल्न आएपश्चात प्रहरीले सुशान्तलाई समेत पक्राउ गरेको छ । 

सुनसरी, इनरूवा नगरपालिका-४ बसपार्क चोकबाट अवैध लागूऔषध ब्राउनसुगर जस्तो देखिने पदार्थ करिब १ ग्राम ५ सय मिलिग्राम सहित मोरङ केराबारी गाउँपालिका-८ बस्ने २५ वर्षीय हरि धमलालाई बिहीबार दिउँसो प्रहरीले पक्राउ गरेको छ । जिल्ला प्रहरी कार्यालय सुनसरी र अस्थायी प्रहरी पोष्ट बसपार्क ईनरूवाबाट खटिएको प्रहरीले उनलाई उक्त पदार्थ सहित पक्राउ गरेको हो । 

यस सम्बन्धमा प्रहरीले आवश्यक अनुसन्धान गरिरहेको छ ।