काठमाडौं, लागूऔषध नियन्त्रण ब्यूरो कोटेश्वर काठमाडौंबाट खटिएको प्रहरीले अवैध लागूऔषध कोकिन ४ किलो २ सय ५८ ग्राम सहित २ जनालाई पक्राउ गरेको छ । पक्राउ पर्नेहरूमा कोलम्बियन नागरिक ६२ वर्षीया YONETH GARZON CAICEDO र भारतीय नागरिक ३७ वर्षीया REBECCA PULLE रहेका छन् । उक्त ब्यूरोबाट खटिएको प्रहरीले असार ३१ गते कतारको एयरवेजद्वारा कोलम्बियाबाट दोहा हुँदै काठमाडौं आएकी YONETH GARZON लाई काठमाडौं महानगरपालिका-१६ ठमेलबाट नियन्त्रणमा लिई तलासी गर्दा उनको साथमा रहेको सुटकेसभित्र फल्स बटम बनाई ब्लाङकेट, म्याट, ज्याकेट, एप्रोन र नेक पिलो भित्र सिलिकनमा मिसाई लुकाई राखेको उक्त कोकिन फेला पारी पक्राउ गरेको हो । साथै थप अनुसन्धानको क्रममा उक्त कोकिन लिन भारतको मणिपुरबाट काठमाडौं आएकी REBECCA लाई आइतबार प्रहरीले पक्राउ गरेको हो ।

यसैगरी काठमाडौं महानगरपालिका-२८ पद्मोदय चोकबाट अवैध लागूऔषध चरेस जस्तो देखिने पदार्थ करिब ६ किलोग्राम सहित २ जनालाई सोमबार बिहान प्रहरीले पक्राउ गरेको छ । पक्राउ पर्नेहरूमा धादिङ गजुरी गाउँपालिका-८ बस्ने २७ वर्षीय युवराज तामाङ र २७ वर्षीय नरेश तामाङ रहेका छन् । प्रहरी वृत्त सिंहदरबारबाट खटिएको प्रहरीले उनीहरूलाई उक्त पदार्थ सहित पक्राउ गरेको हो । साथै उनीहरूले प्रयोग गरेको बा.प्र.०२-०६० प ६१८८ नम्बरको मोटरसाइकल समेत प्रहरीले बरामद गरेको छ । 

यस सम्बन्धमा प्रहरीले आवश्यक अनुसन्धान गरिरहेको छ ।