काठमाडौं, सिन्धुली गोलञ्जोर गाउँपालिका-५ ताप्केडाँडा घर भएका २५ वर्षीय सुनिल भन्ने केशवराज हायुको हत्या गरेको घटनामा संलग्न रहेको अभियोगमा २ जनालाई प्रहरीले पक्राउ गरेको छ । पक्राउ पर्नेहरूमा ललितपुर महालक्ष्मी नगरपालिका-७ चाँगाथली बस्ने सिन्धुली सुनकोशी गाउँपालिका-४ कोटगाउँ घर भएका २१ वर्षीय देवराज ढुंगेल र २० वर्षीय जयराम अधिकारी रहेका छन् । 

ललितपुर महालक्ष्मी नगरपालिका-८ शेराफाँट लुभुस्थित तरकारी बारीमा रहेको ईनारमा केशवराजको शव बुधबार फेला परेको घटनाको अनुसन्धानको क्रममा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उक्त कार्यमा संलग्न देवराजलाई जिल्ला प्रहरी परिसर ललितपुरको समन्वयमा शुक्रबार र जयरामलाई जिल्ला प्रहरी कार्यालय सिन्धुलीको समन्वयमा आइतबार पक्राउ गरेको हो । साथै प्रारम्भिक अनुसन्धानको क्रममा उनीहरूले भोजपुर अरूण गाउँपालिका-३ बस्ने २१ वर्षीय पारूहाङ राईको गत मंसिर २५ गते हत्या गरी शव भक्तपुर सूर्यविनायक नगरपालिका-७ देउराली भञ्याङको झाडीमा फालेको समेत खुल्न आएको छ । 

उनीहरूलाई कर्तव्य ज्यान सम्बन्धी कसुरमा आवश्यक अनुसन्धान तथा कारवाहीको लागि जिल्ला प्रहरी परिसर ललितपुर पठाइएको छ ।