धनकुटा, डाँका चोरीमा संलग्न रहेको अभियोगमा ३ जनालाई शनिबार राति प्रहरीले पक्राउ गरेको छ । पक्राउ पर्नेहरूमा सिन्धुली दुधौली नगरपालिका-६ बस्ने ३० वर्षीय धन बहादुर भन्ने दान बहादुर तामाङ, सोही नगरपालिका-१२ बस्ने ३३ वर्षीय सन्तोष भन्ने प्रेमलाल घिसिङ र सोही नगरपालिका-१० बस्ने ३८ वर्षीय राजु तामाङ रहेका छन् । 

धनकुटा नगरपालिका-७ मदन चोकस्थित एकान्त बाटोमा २ वटा मोटरसाइकलमा आएका अपरिचित व्यक्तिहरूले गत शुक्रबार पीडित महिलालाई धाक धम्की दिई १ तोला २ आना बराबरको सुनको सिक्री डाँका चोरी गरी फरार भएको घटनाको अनुसन्धानको क्रममा जिल्ला प्रहरी कार्यालय धनकुटाबाट खटिएको प्रहरीले उक्त कार्यमा संलग्न उनीहरूलाई सुनसरी धरान उपमहानगरपालिका-८ वरगाछीस्थित एक होटलबाट पक्राउ गरेको हो । साथै प्रहरीले उनीहरूको साथबाट सुन जस्तो देखिने धातुको विभिन्न गरगहना, मोबाइल ६ थान, प्र.३-०२-०१३ प ८००१ नम्बर र बा.८२ प ९५६४ नम्बरको मोटरसाइकल समेत बरामद गरेको   छ । 

यस सम्बन्धमा प्रहरीले आवश्यक अनुसन्धान गरिरहेको छ ।