यएईस्थित विभिन्न कलेजमा अध्ययन गर्न पठाई ठगी गर्ने कन्सन्टेल्सीका संचालकहरू पक्राउ

२०८३-०३-२७

A
A^-
A⁺

काठमाडौं, युएईस्थित विभिन्न कलेजमा अध्ययन गर्न पठाई ठगी गरेको अभियोगमा ९ जना कन्सन्टेल्सीका संचालकहरूलाई केन्द्रीय अनुसन्धान ब्यूरोबाट खटिएको प्रहरीले शुक्रबार पक्राउ गरेको छ ।

पक्राउ पर्नेहरूमा काठमाडौं डिल्लीबजारस्थित Eduport Pvt. Ltd. कन्सल्टेन्सीका संचालकहरू गोकर्णेश्वर नगरपालिका-८ माकलबारी घर भएका ४० वर्षीय रूपक कोईराला, कास्की घर भएका ३७ वर्षीय राजेश भण्डारी, बारा घर भएका ३७ वर्षीय सन्तोष खतिवडा, काठमाडौं पुतलीसडकस्थित Westford Education Pvt. Ltd. कन्सल्टेन्सीका संचालक काठमाडौं चावहिल बस्ने चिन्टु श्रेष्ठ (सोनी श्रेष्ठ), काठमाडौं बानेश्वरस्थित प्रोप एभिएसन प्रा.लि. कन्सल्टेन्सीका संचालकहरू ललितपुर पाक्साटोल बस्ने ३८ वर्षीय सुरेन्द्र महर्जन, सर्लाही घर भएका ३५ वर्षीय दिवस पोखरेल, सिराहा घर भएका २६ वर्षीय मनित आचार्य, धनकुटा घर भएका ३९ वर्षीय शेखर पाण्डे र काठमाडौं कालिमाटीस्थित एस्पायर ग्लोवल प्रा.लि. कन्सल्टेन्सीका संचालक सुनसरी घर भएका २७ वर्षीय बिशाल चापागाई रहेका छन् ।

प्रारम्भिक अनुसन्धानको क्रममा उनीहरूले काठमाडौंस्थित विभिन्न स्थानमा कन्सल्टेन्सी संचालन गरी नेपाली विद्यार्थीहरूलाई उच्च शिक्षा हासिलका लागि युएईमा संचालित शैक्षिक संस्थाहरूलाई अनुमति दिने आधिकारिक, उच्च शिक्षा मन्त्रालय अन्तर्गतको निकाय MOHESR/ Commission for Academic Accreditation (CAA) बाट समेत स्वीकृति नलिएको कलेजमा अध्ययन गराउन पठाई सो अध्ययन मार्फत फ्रान्स तथा अष्ट्रेलिया लगायतका मुलुकका विश्वविद्यालयहरूबाट मान्यता प्राप्त कलेजमा Credit Transfer समेत हुने भनी झुक्यानमा पारी ठगी गरेको खुल्न आएको छ ।

यस सम्बन्धमा प्रहरीले आवश्यक अनुसन्धान गरिरहेको छ ।

सम्बन्धित समाचार

स्रोत नखुलेको भारतीय रूपैयाँ सहित एक जना पक्राउ

२०८३-०५-२७

पर्सा, वीरगंज महानगरपालिका-१६ रजतजयन्ती चोकबाट स्रोत नखुलेको ४ लाख ५० हजार भारतीय रूपैयाँ सहित भारत बिहार मोतीहारी पलानवा थाना-१० बस्ने ५५ वर्षीय अशोक कुमारलाई शुक्रबार दिउँसो प्रहरीले पक्राउ गरेको छ । प्रहरी चौकी इनर्वाबाट खटिएको प्रहरीले भारतबाट वीरगंजतर्फ आउँदै गरेको बीआर ०६ एटि ६४४५ नम्बरको मोटरसाइकलमा सवार उनलाई उक्त नगद सहित फेला पारी पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।

अनलाइन सट्टेबाजी खेल्ने/खेलाउने कार्यमा संलग्न तीन जना पक्राउ

२०८३-०५-२६

झापा, अनलाइन सट्टेबाजी खेल्ने/खेलाउने कार्यमा संलग्न रहेको अभियोगमा ३ जनालाई बुधबार प्रहरीले पक्राउ गरेको छ । पक्राउ पर्नेहरूमा बिर्तामोड नगरपालिका-४ बस्ने ४१ वर्षीय किरण कान्दङवा, ३८ वर्षीय हेक्की श्रेष्ठ र २७ वर्षीय उज्जवल गुरागाँई रहेका छन् । बिर्तामोड नगरपालिका-४ स्थित वृक्ष क्याफेको परिसरमा अनलाइन सट्टेबाजी खेल्ने/खेलाउने कार्य भइरहेको भन्ने सूचनाको आधारमा जिल्ला प्रहरी कार्यालय झापाबाट खटिएको प्रहरीले उक्त कार्यमा संलग्न उनीहरूलाई पक्राउ गरेको हो । उनीहरू उपर जिल्ला अदालत झापाबाट ५ दिन म्याद थप अनुमति लिई यस सम्बन्धमा प्रहरीले आवश्यक अनुसन्धान गरिरहेको छ ।

बैंकिङ कसुर मुद्दाका फरार प्रतिवादी पक्राउ

२०८३-०५-२५

काठमाडौं, बैंकिङ कसुर मुद्दाका फरार प्रतिवादी टोखा नगरपालिका-३ बस्ने काभ्रे नमोबुद्ध नगरपालिका-५ घर भएका ४१ वर्षीया सम्झना लामालाई बुधबार प्रहरीले पक्राउ गरेको छ । जिल्ला अदालत भक्तपुरको २०८२ मंसिर २९ गतेको फैसलाले १ महिना कैद सजाय र १ लाख रूपैयाँ जरिवाना ठहर भई फरार रहेका उनलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले टोखा नगरपालिका-३ बाट पक्राउ गरेको हो । उनलाई फैसला कार्यान्वयनको लागि जिल्ला अदालत भक्तपुरमा पेश गरिएको छ ।

सुन तथा चाँदीका गरगहना चोरी गर्ने तथा खरिद गर्ने चार जना पक्राउ

२०८३-०५-२५

काठमाडौं, सुन तथा चाँदीका गरगहना चोरी गर्ने तथा खरिद गर्ने कार्यमा संलग्न रहेको अभियोगमा चार जनालाई प्रहरीले पक्राउ गरेको छ । पक्राउ पर्नेहरूमा काठमाडौं महानगरपालिका-३२ जडिबुटी बस्ने महोत्तरी गौशाला नगरपालिका-५ घर भएका २९ वर्षीया सावन कुशवाहा, तेह्रथुम आठराई गाउँपालिका-८ घर भएकी ३६ वर्षीया पबित्रा लिम्बु, दोलखा गौरीशंकर गाउँपालिका-५ घर भएका २५ वर्षीय श्रीकृष्ण विश्वकर्मा र काठमाडौ महानगरपालिका-३२ नरेफाँट बस्ने भोजपुर भोजपुर नगरपालिका-५ बोखिम घर भएका ४३ वर्षीया रमिला विक रहेका छन् । उनीहरू मध्ये उक्त गरगहना चोरी गर्ने सावन तथा गरगहना खरिद गर्ने पबित्रा, श्रीकृष्ण र रमिला रहेको खुल्न आएको छ । काठमाडौं महानगरपालिका-३२ नरेफाँटस्थित घरबाट गत साउन १८ गते सुन तथा चाँदीका गरगहनाहरू चोरी गरी फरार भएको घटनाको अनुसन्धानको क्रममा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनीहरूलाई पक्राउ गरेको हो । साथै प्रहरीले उनीहरूको साथबाट सुन तथा चाँदीका विभिन्न गरगहना समेत बरामद गरेको छ । उनीहरूलाई आवश्यक अनुसन्धान तथा कारबाहीको लागि जिल्ला प्रहरी परिसर काठमाडौं पठाइएको छ ।

कुवेत पठाइदिन्छु भन्दै ठगी गर्ने व्यक्ति पक्राउ

२०८३-०५-२५

काठमाडौं, वैदेशिक रोजगारीमा आकर्षक तलबको प्रलोभनमा पारी कुवेत पठाइदिन्छु भन्दै रकम ठगी गरेको अभियोगमा भक्तपुर मध्यपुर थिमी नगरपालिका लोकन्थली बस्ने सप्तरी सुरङ्गा नगरपालिका-५ घर भएका २४ वर्षीय मोहमद नुरूलालाई सोमबार प्रहरीले पक्राउ गरेको छ । महोमदले कुवेत पठाइदिन्छु भन्दै १ जना पीडितबाट १ लाख ५ हजार रूपैयाँ लिई सम्पर्कविहीन भएको भन्ने पीडितको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनलाई भक्तपुर लोकन्थलीबाट पक्राउ गरेको हो । उनलाई आवश्यक अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं पठाइएको छ ।

स्रोत नखुलेको नगद सहित पक्राउ

२०८३-०५-२३

नवलपरासी पश्चिम, प्रतापपुर गाउँपालिका-९ बेलाटारीबाट स्रोत नखुलेको नगद २१ लाख ६० हजार रूपैयाँ सहित २ जनालाई सोमबार दिउँसो प्रहरीले पक्राउ गरेको छ । पक्राउ पर्नेहरूमा सोही गाउँपालिका-६ गुठीप्रसौनी बस्ने २५ वर्षीय अंकित गुप्ता र २० वर्षीय अभिनन्दन गुप्ता रहेका छन् । लुम्बिनी प्रदेश प्रहरी कार्यालय दाङ र इलाका प्रहरी कार्यालय बेलाटारीबाट खटिएको प्रहरीले यूपी ५६ बीएच ६५५६ नम्बरको मोटरसाइकलमा सवार उनीहरूलाई उक्त नगद सहित पक्राउ गरेको हो ।यस सम्बन्धमा प्रहरीले आवश्यक अनुसन्धान गरिरहेको छ ।